12. அக்கறை இருப்பதை காட்டுங்க!

12. அக்கறை இருப்பதை காட்டுங்க!

ஒருத்தர் ஒரு நாள் காலை அரைதூக்கத்தில ஆஃபீஸுக்குள்ள நுழைஞ்சார். முந்தைய இரவு வேலை முடிச்சு வீடு திரும்ப மணி ரெண்டு. கடுமையான அவசரமான வேலை. செஞ்சே ஆகணும் என்கிற நிலமையில் வேலையை முடிச்சுட்டே வீட்டுக்குப்போனார். இன்னைக்கு காலையில லீவு போட்டுட்டலாமான்னு யோசிச்சு இல்லை இன்னும் தொடர வேண்டிய வேலைகள் நிறைய இருக்கேன்னு கொஞ்சமே தாமதம் ஆனாலும் ஆஃபீஸ் வந்தாச்சு. அவரோட ரூம்ல நுழைஞ்சு உக்காந்தா மேசை மேல ஒரு கார்டும் அவருக்கு ரொம்ப ரொம்ம்ம்ம்ம்ப பிடிச்ச ஃப்ரெஷ் ஸ்வீட்டும்! விசாரிச்சா பாஸ் வழக்கமான நேரத்துக்கே ஆஃபீஸ் வந்தாச்சுன்னு தகவல். இவர் அப்படியே நெகிழ்ந்து போயிட்டார். பாஸ் வீட்டையும் அலுவலகத்தையும் சேத்து மேனேஜ் பண்ணற பெண்மணி. அவர் இரவு செஞ்ச வேலையை தெரிஞ்சுகொண்டு காலையில் கொஞ்சம் நேரமெடுத்து அவருக்கு பிடிச்ச ஸ்வீட்டை வாங்கி… அடடா! என் பாஸ் போல உண்டா ந்னு கண்ணீர் வரவெச்ச தருணம்!

சின்ன சின்ன விஷயங்கள்தான். ஆனா சமயத்தில எவ்வளவு பெரிய விளைவை கொடுக்குது! வேலை செய்யறவங்களுக்கு எவ்வளவு ஒரு உற்சாகம் கொடுத்து விஸ்வாசத்தை வளர்கிற விஷயம்!

எத்தனை பேர் நம்மை சுத்தி பல வேலைகளை நேர்த்தியா செஞ்சு கொண்டு இருக்காங்க! ஓட்டல்ல சாப்ட்டுட்டு இன்னைக்கு பொங்கல் பிரமாதம்ன்னு எப்பவாவது முதலாளிகிட்டயாவது சொல்லி இருக்கோமா? மோட்டார் சைக்கிள் பழுது நீக்கி சர்வீஸ் செய்து கொடுத்த மெகானிக்கிட்ட நல்லா செஞ்சு இருக்கீங்கன்னு சொல்லி இருக்கோமா?

ஒரு நல்ல விஷயத்தை நாம பாராட்டறோம்ன்னா மனசுக்குள்ள வெச்சுக்காதீங்க. வெளிப்படையா சொல்லுங்க. கேட்ட ஆசாமி அன்னைக்கு உற்சாகமா இருப்பார்.

உங்க அக்கறையை வெளிப்படுத்துங்க!

11. மற்றவரோட உணர்ச்சிகள், நிலை …. நிற்க அதற்குத்தக!

11. மற்றவரோட உணர்ச்சிகள், நிலை …. நிற்க அதற்குத்தக!

எத்தனை முறை நாம செல்ஃபோன் கம்பனி கஸ்டமர் சர்வீஸுக்கு ஃபோன் பண்ணி இருப்போம்! (நான் ஒரு தரம் கூட செஞ்சதில்லை) நாம் நிதானமா அமைதியான குரல்ல நம்ம புகாரை சொன்னா அவங்க சரியா பதில் சொல்லுவாங்க, வேலை முடிஞ்சுடும்ன்னு நினைப்போம். சரிதான். அப்படி ஆக நிறைய வாய்ப்பு இருக்கு. ஆனா அதே நாம் வேற விஷயத்தால செம கடுப்புல இருந்தா? இருக்கற வேலை போறாதுன்னு இவன் வேற தப்பான பில்லை அனுப்பறான்! என்ன வேலை செய்யறாங்கன்னு திட்டிகிட்டே இருந்தா, நம்ம கால் வேற ஹோல்ட்லேயே இருக்கு. இப்ப நாம இன்னும் எரிச்சலடைஞ்சுட்டோம். ஒரு வழியா எதிர்முனையில் ஆசாமி வரார். நாம் திட்டலை; ஆனா எரிச்சலோட நம்ம புகாரை சொல்லறோம்.

நல்ல சர்வீஸ் கொடுக்கற ஆசாமியா இருந்தா நாம கத்தினாக்கூட அனாவசியமா விஷயத்தை வளர்க்காம “சாரி சார், தகவலை கொடுங்க; உடனே சரி செஞ்சுடறேன்!” ந்னு சமாதானப்படுத்துவார். தகவல் கொடுத்ததும் “சரி சார், இத்தனை நேரத்துக்குள்ள சரி செஞ்சுடறேன்”னு சொல்லி நம்மை அமைதியா ஃபோனை வைக்க வைப்பார். நாமளும் “பரவாயில்லையே! பில் அனுப்பறதுல சொதப்பினாலும் கஸ்டமர் சர்வீஸ் பரவாயில்லை” ன்னு நினைச்சுண்டே அடுத்த வேலையை பார்க்கப்போவோம். இந்த சர்வீஸ் ஆசாமிக்கு நிறையவே ஈக்யூ இருக்கு! அந்த கம்பனிக்கு இவர் விலை மதிக்க முடியாத பெரிய சொத்து!

அவர் செஞ்சதை பாருங்க. நாம் சொன்னதை காது கொடுத்துக்கேட்டார். நம்ம எரிச்சலை யூகிச்சுக்கொண்டார். நம்ம இடத்தில அவரை வெச்சுப்பாத்தார். நம்மோட உணர்ச்சிகள் அவருக்கு புரிஞ்சது. அதுக்கு தக்க பதிலை கொடுத்தார். இந்த தக்க பதில் - இதான் சமாசாரம். சும்மா மத்தவங்க உணர்ச்சிகளை நாமும் பிரதிபலிக்கறது சரியா இருக்காது. நாம எரிச்சல்பட்டோம்ன்னா அவரும் எரிச்சலோட பதில் சொல்ல ஆரம்பிச்சு இருந்தா என்ன ஆகியிருக்கும்?

தக்க எதிர்வினை எப்பவும் நாம் மத்தவங்களோட உணர்ச்சிகளை புரிஞ்சுக்கறோம், அது முக்கியம்ன்னு நினைக்கிறோம் என்பதை சொல்லும்.

இதுக்கு பயிற்சியா ரெண்டு மூணு உணர்ச்சிகரமான நிகழ்வுகளை யோசிச்சு பாருங்க. அதுல உங்களைத்தவிர இன்னும் ஒருத்தராவது இருக்கணும். நிகழ்வில மறைவான விஷயம் எதுவும் இருக்கக்கூடாது. என்ன நடந்தது என்கிறது வெளிப்படையா இருக்கணும்.

அந்த இன்னொருத்தர் என்ன செஞ்சார்? அவரோட செயல் உங்களுக்கு ஆறுதல் கொடுத்ததா இல்லை உணர்ச்சியை இன்னும் அதிகமாக்கியதா? நீங்க அவங்க இடத்தில என்ன செஞ்சு இருப்பீங்க?

இப்ப மத்தவங்களோட உணர்ச்சிக்கு தக்கபடி நாம் என்ன செய்ய முடியும்? ஒரு சான்ஸ் வர காத்திருங்க. வீட்டிலேயோ. அலுவலகத்திலேயோ… நமக்கு கொஞ்சம் க்ளோஸானவங்க. நம்ம பயிற்சியா செய்ய வேண்டியது அவங்களோட மூடை பாத்து அதுக்கு தகுந்தபடி கொஞ்சம் உதவியா ஏதாவது செய்யறது. நேரமில்லாம பறந்துகிட்டு இருக்கறவங்களுக்கு அவங்க வேலையில கொஞ்சம் உதவி செய்யறது. வீட்டு வேலையில இன்னும் கொஞ்சம் அதிகமா பகிர்ந்துக்கிறது… யோசிச்சா நிறைய வாய்ப்புகள் கிடைக்கும். இதை செய்ய அவங்க “அட. நம்ம மேல இவனுக்கு அக்கறை இருக்கு!”ன்னு நினைப்பாங்க. அது நல்லது. உறவை பலப்படுத்தும்.

10. மத்தவங்க உணர்வுகளை மதிச்சு ஒத்துக்கொள்ளுங்க.

10. மத்தவங்க உணர்வுகளை மதிச்சு ஒத்துக்கொள்ளுங்க.

அலுவலகத்துக்குள்ள போய்கிட்டு இருக்கீங்க. சக ஊழியர் ஒத்தரை கடந்து போறீங்க. அவர் கொஞ்சம் விட்டா அழுதுடுவார் போலிருக்கு. ஏதாவது பிரச்சினையா ந்னு கேக்கறீங்க. “வீட்டுல பிரச்சினை!”  “ ஓ! சரி சரி, வேலையில் இறங்குங்க. சரியாயிடும்” ந்னு ஒரு பொன் மொழியை உதிர்த்துட்டு போய்கிட்டே இருக்கீங்க. மீதி நாள் முழுதும் அவங்க உங்களை தவிர்த்துகிட்டே இருக்காங்க.

ஏன்யா, மூஞ்சிய பாத்தா ஏதோ பிரச்சினைன்னு தெரியலை? இதுக்கு ஒரு கேள்வியா? அப்புறம் என்ன வேலை எல்லாத்தையும் சரி பண்ணிடும்? டிவோர்ஸ் ஆகிற நிலையை அது தவிர்த்துடுமா? கர்ர்ர்ர்!

மாறா ஆதுரத்தோட “நீங்க கஷ்டத்தில இருக்கீங்க. நான் செய்யக்கூடியது ஏதாவது இருக்கா?” ந்னு கேட்டு இருந்தா அது சரியா இருக்கும். நமக்கு அது கொஞ்சம் துன்பத்தை ஏற்படுத்துமானாலும் பரவாயில்லைன்னு மத்தவங்களோட துன்பத்தில பங்கெடுக்கணும். பெரிசா ஒண்ணும் வேணாம். அவங்க கஷ்டத்தில இருக்காங்கன்னு அக்னாலெட்ஜ் பண்ணா போதும். அவங்களோட உணர்ச்சி தப்புன்னு சொல்லவோ மாத்த முயற்சிக்கவோ இது ஒண்ணும் பெரிய விஷயம் இல்லைன்னு சொல்லவோ முயற்சிக்க வேணாம். அவரவருக்கு அவரவர் கவலை. இன்னைக்கு இப்போதான் டிவில செய்திகள் பார்த்தேன். சென்னை புயலுக்கு பிறகு ஒரு பெண்மணி சொல்லறார், “காஷ் இல்லாம கூட இருந்துடலாம். செல்ஃபோன் இல்லாம இருக்க முடியலை!” இதை கேட்டு எனக்கு சிரிக்கறதா அழறதான்னு தெரியலை. இருக்கட்டும். அது என் தனிப்பட்ட தேர்வு. அந்த அம்மணிக்கு அது நிஜமான பிரச்சினை. அதை தள்ளிடக்கூடாது; மதிக்கணும். மேலே சொன்ன உதாரணத்தில “அவங்க சொன்னதை திருப்பிச்சொல்லி இருந்தாக்கூட போதும். அது அவங்களுக்கு பிரச்சினையை கொடுக்கறது ந்னு ஒத்துக்கொண்டா போதும். அதைப்பத்தி ஒரு தீர்மானத்துக்கும் வரத்தேவையில்லை. நம்ம சொந்த கருத்து எல்லாம் நம்மோடவே இருக்கட்டும். இப்படிச்செய்ய அவங்களை ஒரு பேலன்ஸுக்கு கொண்டு வருவோம்.

9. மாற்ற முடியாததை தவிர்க்காதீர்கள்!

9. மாற்ற முடியாததை தவிர்க்காதீர்கள்!

ஒரு அலுவலகத்தில வேலை செய்யறீங்க. உங்களுக்கும் சேகருக்கும் ஏழாம் பொருத்தம். உங்ககிட்ட ஏதாவது மந்திரக்கோல் இருந்தா சூ மந்த்ராகாளி! இந்த ஆசாமியை வேற டிபார்ட்மெண்டுக்கு மாத்துன்னு மாத்தி இருப்பீங்க. ஹும்! அப்படி எந்த மந்திரக்கோலும் இல்லாததால செய்ய முடியலை. கொடுமை என்னன்னா இப்ப உங்க மேலதிகாரி கூப்பிட்டு நீங்க ரெண்டு பேரும் சேர்ந்து ஒரு வேலையை செஞ்சு முடிக்கச்சொல்லி இருக்கார். சேகர் வந்து நீங்க காண்டீனுக்கு சாப்பிடப்போறப்ப நானும் வரட்டுமா? நாம் செய்ய வேண்டியதை எல்லாம் தீர்மானிக்கலாம்னு கேட்டார். நீங்க ஏன் முடியாது என்கிறதுக்கு ஆயிரம் காரணங்களை தேடி லட்சம் காரணங்களை கண்டு பிடிச்சு அவர்கிட்ட ஒண்ணை சொல்லிட்டீங்க. அவரும் சரின்னுட்டு போயிட்டார்.

என்ன இப்ப? ஆரம்பிச்ச இடத்திலேயேத்தான் இருக்கீங்க. வேலை அப்படியேத்தான் இருக்கு. ரெண்டு பேரும் இணைஞ்சு எப்படி வேலை செய்யறதுன்னு இன்னும் கண்டுபிடிக்க வேண்டி இருக்கு!

இந்த மாதிரி மாட்டிக்கறப்பத்தான் உங்களோட உறவு மேலாண்மை திறமை அதிகமா தேவைப்படுது! இந்த ஆசாமியோட எந்த உறவும் வேணாம்ன்னுதான் நினைச்சீங்க. இருந்தாலும் மேலதிகாரிகள் அவங்களோட வானளாவிய அதிகாரம் அறிவு எல்லாத்தையும் பயன்படுத்தி உங்க ரெண்டு பேரையும் ஒரு டீம் ஆக்கிட்டாங்க. இப்ப நீங்க வேலையை விட்டு விலகறதா முடிவு பண்ணாலொழிய சேகரோட சேர்ந்து வேலை செஞ்சுதான் ஆகணும். என்ன செய்யலாம்?

முதல்ல செய்ய வேண்டியது இந்த வேலையையோ சேகரையோ தவிர்க்கப்பார்க்காதீங்க! நிர்பந்தத்தை ஒத்துக்கொண்டு மேலே ஆக வேண்டியதைப் பாருங்க.

இதுக்கு உங்க உணர்ச்சிகளை உன்னிப்பா கவனிக்க வேண்டி வரும். அவற்றை கையாளுவதிலேயும். இதுல நீங்க தனியா ஈடுபடலை என்கிறதால சமூக விழிப்புணர்வும் அவசியம். சமூக மேலாண்மையும் அவசியமே! சேகர் இடத்தில உங்களை வெச்சுப்பாருங்க. அவரை சந்திச்சு உட்கார்ந்து பேசுங்க. இந்த வேலையில அவர் என்னென்னெ செய்ய முடியும்; நீங்க என்ன செய்ய முடியும்; மீதம் இருந்தா அதை எப்படி செய்யறது; செயல்திட்டம் என்ன? எல்லாத்தையுமே திட்டமிடுங்க. இப்படி பேசும் போது அவரோட உடல்மொழி என்ன சொல்லுது? கவனியுங்க. உங்களுக்கு அவரை பிடிக்காது, சரி. அவருக்கும் உங்களை பிடிக்காம இருக்கலாம்! அதை நினைச்சு பாத்து இருக்கீங்களா? இது ஒரு சுகமான அனுபவமா இருக்காதுதான். இருந்தாலும் வேலை செய்ய ஒரு உறவு ஏற்படட்டும்!

உங்களை எனக்குப்பிடிக்கலைன்னு சொல்ல வேண்டியது இல்லை. அது அவருக்கும் அனேகமா தெரிஞ்சே இருக்கலாம்! ஆனா நான் என் பங்கை மத்த வேலைகளோட சேர்த்து தனியா செய்ய விரும்பறேன்னு சொல்லறதுல தப்பில்லை. அவ்வப்போது கலந்தாலோசித்து வேலை சரியா நடக்கிறதை உறுதி செய்துக்க திட்டம் போடலாம்.

நீங்க சொல்லறதுக்கு எல்லாம் சேகர் ஒப்புக்கொண்டா சரி. இல்லைன்னா அவர் வழியை சொல்லட்டும் நமக்கு எப்படி தோது படுதுன்னு பார்ப்போம். மேலும் சுய விழிப்புணர்வையும் சமூக மேலாண்மையையும் செயலுக்கு கொண்டு வந்து ஏதோ ஒரு வேலை செய்யக்கூடிய திட்டத்தை ரெண்டு பேரும் ஒத்துக்கணும்.

சரி, வேலை துவங்கியாச்சு. நடுவில அனேகமா பிரச்சினைகள் வந்து உங்களை சலிப்படைய வைக்கலாம். பிரச்சினைகள் ஏன் வந்தன? நமக்கு சலிப்பு ஏன் வந்தது? அடுத்து நம்மை நாமே மேலாளுவது பத்தி யோசிங்க. சேகரோட அடுத்து சந்திக்கும் போது வேலையின் குறிக்கோளை இன்னொரு தரம் நினைவூட்டிக்கொள்ளுங்க!

வேலை ஒரு வழியா முடிஞ்சப்பறம் ரெண்டு பேரும் சேர்ந்து எதை சாதிச்சீங்க என்பதை ஒப்புக்கொள்ள ஒரு வழியை கண்டுபிடிங்க. யார் கண்டா? வேலையை சேர்ந்து முடிச்ச பின்னே உங்க ரெண்டு பேருக்கு இடையே ஒரு நல்ல உறவு கூட ஏற்படலாம்!

8. கோபம்

8. கோபம்

யார் வேணும்னாலும் கோபப்படலாம்; அது ரொம்ப சுலபம். ஆனா சரியான நபர்கிட்ட சரியான அளவு சரியான நேரத்தில சரியான நோக்கத்தோட கோபப்படறது- அது சுலபமே இல்லை. இப்படிச்சொன்னவர் அரிஸ்டாட்டில். க்ரேக்க தத்துவ ஞானி. ரத்தினச்சுருக்கமா எமோஷனல்இண்டலிஜென்ஸ் பத்தி சொல்லிட்டார்! நம் உணர்வுகள் உறவுகள் பத்தி இதைவிட ஆழ்ந்தும் தெளிவாவும் யாரும் சொல்ல முடியாது! இது கைவரப்பட்டுட்டால் உங்க உசாநு பயணம் வெற்றின்னு எடுத்துக்கலாம்!

கோபம் ஒரு காரணத்துக்காகத்தான் வரது. அதை அமுக்கறதும் நல்லதில்லை. உதாசீனம் செய்யறதும் சரியில்லை.அதை சரியா திட்டமிட்டு வெளிப்படுத்தினா நல்லது நடக்கும்; உங்க உறவுகளும் மேம்படும். நிஜமா!

ஹாக்கி, புட்பால், பாஸ்கெட் பால் - இப்படி பல விளையாட்டுகளையும் எடுத்துக்கோங்களேன். இடைவேளையில கோச் என்ன செய்வார். கோச்சுப்பார்! ஆமா!

நேரடியா விஷயத்துக்கு வருவார். நேரம் குறைவு இல்ல? “ஏண்டா முட்டாள் பந்தை ஏண்டா தடவி கொடுத்துண்டு இருக்கே?” ன்னு ஆரம்பிச்சு படபடன்னு பலரையும் ஒரு பிடி பிடிச்சுட்டு ரைட் இப்ப இப்படி செய்யுங்கன்னு சில விஷயங்களை குறிப்பா சொல்லுவார். டீம் முழுக்க புத்துணர்ச்சியோட நல்ல ஆட்டத்தை வெளிப்படுத்த தயாரா வந்து நிக்கும். கோச் தன் உணர்ச்சிகளை டீமை திருப்பி ஆட்டத்துக்கு தயார் செய்ய பயன்படுத்தினார். கோபத்தை சரியா வெளிப்படுத்தினா நிலைமையோட தீவிரம் புரியும்; நீங்க அதுக்கு கொடுக்கிற முக்கியத்துவம் புரியும்.

இதுவே ரொம்ப அதிகமாகவோ அல்லது தப்பான நேரத்திலோ வெளிப்படுத்திக்கொண்டே இருந்தா “ ஆமா இவன் எப்பவும் இப்படித்தான் சொல்லிண்டு இருப்பான்”னு தோணிடும். சீரியஸா எடுத்துக்க மாட்டாங்க.

கோபத்தை இப்படி மடை திருப்பி பயன்படுத்தறதுக்கு கொஞ்சம் நேரமாகும். அடிக்கடி பயிற்சி கிடைக்காது இல்லையா? ஆமா, அடிக்கடி கோபப்படுகிற நிலமை வராமலே இருக்கட்டும்! :-)

உங்களோட சுய மேலாண்மை திறனை இதுக்கு பயபடுத்தணும். எதெல்லாம் நம்மை கோபப்படுத்துது? லேசான எரிச்சல் முதல் படு பயங்கர கோபம் வரை. எல்லாத்தையும் சில வார்த்தைகளிலே எழுதுங்க. அடுத்து இதுல எங்கே எப்போ எவ்வளவு கோபத்தை வெளிப்படுத்தலாம்ன்னு உங்க கருத்தையும் எழுதுங்க. இந்த தேர்வுகளை செய்யும் போது உங்க சமூக விழிப்புணர்வையும் செயலுக்கு கொண்டு வந்து யார் யார் இதுக்கு எப்படி எதிர்வினை செய்வாங்கன்னு யோசியுங்க.

வலுவான உறவுக்கு நேர்மை அவசியம். உங்களுக்கும் சரி உங்களை சார்ந்தவர்களுக்கும் சரி அது அவசியம். இது சில சமயம் கோபத்தை வெளிப்படுத்துவதா இருந்தா அதை தவிர்க்க நினைக்கக்கூடாது. சரியான படிக்கு கையாண்டா, நாம் தப்பு பண்ணோம்; அதுக்குத்தானே கோவிச்சுண்டார். இனி தப்பு செய்யக்கூடாது!” ந்னு மத்தவங்க மனசில தோணணும்!

7. திறந்த கதவு…

7. திறந்த கதவு…

நீங்க ஒரு நிறுவனத்தில மேலாளரா? இந்த பாலிசி உங்களுக்கு சரி வருமான்னு பாருங்க. உங்க கீழ வேலை செய்யற யாரும் எப்போ வேணுமானாலும் உங்க ரூமில நுழையலாம். அவங்க பிரச்சினைகளை விவாதிக்கலாம். கருத்துக்களை சொல்லலாம்.

இப்படி இருக்கறதுல சௌகரியம் என்னன்னா யாரும் என் கருத்துக்களை கேக்கறதில்ல; பல விஷயங்கள் நிலுவையிலேயே இருக்கு; நடுல மேனேஜ் செய்யறவஞ்க பல விஷயங்களை அமுக்கிடறாங்க – இப்படி பல புகார்கள் எழ வாய்ப்பு இராது.

பிரச்சினை? அட எல்லாத்துக்கும் இரண்டு பக்கம் இருக்குமில்ல? பிரச்சினை என்னன்னா உங்க நேரம் வெகுவா பறிக்கப்படும். அதுக்கு நீங்க தயாரா இருக்கணும். அப்புறம் மேனேஜ்மெண்ட்ல நடுவில இருக்கிறவங்க மனசு புண் படலாம். “பாரு அவன் சொன்ன விஷயத்துல நடவடிக்கை எடுக்கறதுக்குள்ள மேலே போட்டுக்கொடுத்துட்டான்” என்கிற ரீதியில பல மனத்தாங்கல்கள் வரும். இதை எல்லாம் திறமையா கையாளணும். கீஈஈழே இருக்கிறவர் நேரடியா புகார் கொடுத்தாலும் அதை கேட்டுக்கொண்டு, “சரி,உனக்கு மேலே இருக்கறவர்கிட்ட இதப்பத்தி பேசினியா? இல்லைன்னா போய் பேசு” ன்னு சொல்லி அனுப்பணும். அதே சமயம் அதை தொடர்ந்து கண்காணிக்கணும்.

இப்படிச் செய்ய உங்களுக்கும் உங்க கீழ வேலை செய்யறவங்களுக்கும் உறவுகள் மேம்படும். அவங்களைப்பத்தி நீங்க இன்னும் அதிகமா தெரிஞ்சுக்க முடியும். அவங்களுக்கு அவங்களையும் நிறுவனம் ஒரு பொருட்டா நினைக்குதுன்னு ஒரு பெருமிதம் இருக்கும்.

சாமர்த்தியமா கையாண்டா நல்ல பலன் கொடுக்கக்கூடிய விஷயம் இது!

6. நம்பிக்கைப் பயிர் வளருங்க.

6. நம்பிக்கைப் பயிர் வளருங்க.

நம்பிக்கை…. இதுக்கு ஒரு விளையாட்டு உண்டாம். உங்க பார்ட்னர் அஞ்சடி தள்ளி உங்க பின்னாலே இருப்பார். ஒண்ணு ரெண்டு மூணுன்னு எண்ணினதும் நீங்க அப்படியே பின் பக்கம் சாய்ஞ்சு விழணும்! திரும்பி பார்க்கக்கூடாது! மூணுன்னு சொன்னதும் பார்ட்னர் முன்னே வந்து உங்களை தாங்கிப்பிடிப்பார்! கூடி இருக்கிற எல்லாரும் சிரிச்சுட்டு கலைவாங்க. ஹும்! நம்பிக்கை என்கிறது மட்டும் இவ்ளோ சுலபமா வேகமான கால்கள், வலுவான கைகள், பேலென்ஸ்ன்னு இருந்துட்டா…..

அப்படி இல்லை. அது வளர நாளாகும். ஃபூ ந்னு ஒரு க்ஷணத்தில காணாமப்போகும்! நம்மோட உறவுகளை நிர்ணயிக்கிற ரொம்ப முக்கியமான ஆனா கஷ்டமான சமாசாரம் இது.

இது எப்படி வளரும்?

வெளிப்படையான பேச்சு வார்த்தை; பகிர்ந்து கொள்ள இசைவு; சொல், செயல் நடத்தையில நாள்பட்ட உறுதியா இருக்கிறது. உறவை காப்பாத்திக்கொள்வதில நேர்மை…. இதெல்லாம் கொஞ்சம் உதாரணங்கள். நிறையவே இருக்கும்.

ஒத்தர் நம்பிக்கையை பெற நாமும் நம்பிக்கை ஏற்படறா மாதிரி நடந்துக்கணும். ஒத்தர்கிட்ட அடிக்கடி பேசிகிட்டு இருக்கோம். என்னைக்கோ ஒரு நாள் அவர் திடீர்ன்னு தன் குடும்பத்தைப்பத்தி பர்சனல் உறவுகள், பிரச்சினைகள் பத்தி எல்லாம் பேசறார். நம்பிக்கை வந்தாச்சு. நாம் வெளியே சொல்ல மாட்டோம்ன்னு ஒரு நம்பிக்கையிலதான் சொல்லறார். இதையே நாம வெளியே சொல்லிட்டதா அவருக்கு தெரிஞ்சா ஆட்டம் க்ளோஸ்!

என் கசின் ஒத்தர் வக்கீல். அவர்கிட்ட பேசிகிட்டு இருக்கறப்ப முக்கால்வாசி சிவில் வழக்குகளுக்கு இந்த நம்பிக்கை துரோகம்தான் காரணம்ன்னு சொன்னார். “ எப்படிப்பா இப்படி ஒரு முட்டாள்தனமான காரியம் செஞ்சே?” ந்னு க்ளையண்ட்கிட்ட கேட்டா அவரோட பதில் “ நம்பினேன் சார். துரோகம் செய்யமாட்டான்னு நம்பினேன் சார். இப்படி செஞ்சுட்டான்” என்கிறதுதான்.

நம்பிக்கையை வளர்க்க நாம் நம்மோட சுய விழிப்புணர்வு சுய ஆளுமை எல்லாத்தையும் பயன்படுத்தி நம்மைப்பத்தி கொஞ்சம் சொல்லறோம். அவரும் கொஞ்சம் சொல்லறார். பின்னால் நாமும் இன்னும் கொஞ்சம் சொல்லுவோம். இதே போல கொஞ்சம் கொஞ்சமா வளரும். எல்லாத்தையும் ஒரேயடியா அவர்கிட்ட சொல்லிடணும்ன்னு ஒண்ணுமில்லை. நமக்குள்ள இருக்க வேண்டிய சில விஷயங்கள் என்னைக்குமே நமக்குள்ளேயே இருக்க வேண்டியதுன்னு இருக்கு. அதை வெளியே சொல்ல வேண்டிய தேவையே இல்லை.

இந்த நம்பிக்கை வளர வளரத்தான் நம்முடைய உறவுகள் பலப்படும். யாருடன் நமக்கு பலமான உறவு தேவையா இருக்குன்னு பாருங்க. அவரோட நம்பிக்கையை இன்னும் பலப்படுத்த என்ன செய்யலாம்ன்னு யோசியுங்க. முடிஞ்சா இதை நேரடியா அவர்கிட்ட கேளுங்க. அது அவருடனான உறவை பலப்படுத்த நாம கொண்டிருக்கிற அக்கறையை அவருக்கு காட்டும். இது நம்பிக்கை வளரவும் உறவு பலப்படவும் உதவும்.